Aprendendo da solidaridade das nosas mulleres.

O luns 7 de xuño o alumnado de 3ºESOB rematou coas sesións adicadas á rede de mulleres da illa de San Simón con estas actividades:

_ a primeira consistiu nun obradoiro de debuxo e papiroflexia impartido por Maruxa, directora do Taller Mimarte, tendo como referencia "A Lavandeira de San Simón". Nun obradoiro de papiroflexia, o alumnado realizou un paxariño vermello para construir un móbil colectivo que agora está pendurando na nosa biblioteca xunto a un punto lector cuxa temática son os coidados. 

_ a continuación contamos coa presenza de J. A. Orge, experto en historia de Redondela e membro do Seminario de Estudos Redondeláns, e nun paseo ata A Portela axudounos a comprender mellor a nosa historia recente e a solidariedade das "madriñas". Elas foron as mulleres que formaron unha rede de apoio relacionada cos coidados aos presos da illa e as súas familias. Adicáronse a tarefas tales como lavar e arranxar a roupa, levar comida, ofrecer menciñas ou entregar notas e mensaxes agachados na roupa que arranxaban elas mesmas.

Orge falounos das condicións nas que esas mulleres se atreveron a brindar axuda realizando así unha función esencial para a mellora da vida dos presos e mesmo de como foron multadas e perseguidas. Alba, alumna do grupo e bisneta de Marina, compartiu connosco algunhas das lembranzas familiares en torno á súa bisaboa. 

Vista da Portela dende onde saían as mulleres e vivían algunhas delas. 

A Portela, ao fondo, a illa de San Simón.

J.A. Orge falando sobre a rede de mulleres e o papel que desempeñaron. Ao seu carón está Alba, bisneta de Marina, unha das mulleres. Alba tivo a xenerosidade de compartir con nós algunhas das lembranzas familiares en torno a súa bisaboa.